Allarbesta Anja

Tá ið heiðursmerkjahandanin fyri bogaskjóting varð avgreidd fyri løtu síðan, varð Merkið vundið á stong heili sjey ferðir til heiðurs fyri teimum sjey sigrunum hjá føroysku bogaskjúttunum.

Stórsti vinnarin var compoundskjúttin Anja Eydnudóttir, sum vann alt, ið vinnast kundi hesar leikirnar.

Fult hús í gulli var meira, enn Anja tordi at droyma um, áðrenn leikirnir byrjaðu, og norski venjari hennara, Morten Bøe, eigur stóran lut í heiðrinum, sigur hon. 

Føroysku bogaskjúttarnir vunnu tilsamans sjey gull, eitt silvur og seks bronsuheiðursmerki hesar oyggjaleikirnar, og sostatt eiga tey stóran part í, at Føroyar framvegis eru ovast á samlaða heiðursmerkjalistanum.

Tí verður eisini stórur saknur í teimum, tá ið leikirnir verða hildnir í Gibraltar um tvey ár, tí tá verður ongin bogaskjóting.

Foto og klipp: Ragnar A. Jacobsen