Løgmaður og samgongan leggja kabal

Aksel V. Johannesen, løgmaður, sigur, at arbeitt verður nú við einari loysn, sum skal tryggja, at allir tríggir samgonguflokkarnir verða nøgdir eftir rumblið, sum hevur verið seinastu tíðina, síðani samgongan misti meirilutan í fíggjarnevndini

Løgmaður, sum var gestur í sjónvarpsstovuni í kvøld, sigur, at ein kabal verður løgd.

Arbeitt verður við fleiri møguleikum, og tað er ikki vist, at tað verður neyðugt at velja allar tingnevndirnar av nýggjum.

Landsstýrissessurin í Mentamálaráðnum skal eisini mannast.

At Kristin Michelsen er koyrdur úr tingbólkinum hjá Javnaðarflokkinum, hevði í dag við sær, at Ruth Vang í Framsókn varð koyrd frá sum forkvinna í fíggjarnevndini.

Ruth Vang er sera misnøgd, og hon sigur, at Javnaðarflokkurin hevur verið ein avbjóðing í øllum hesum valskeiðnum.