Allir peningasterku partar kallast saman

Við tveimum politiskum hjálparpakkum hevur politiska skipanin enn ikki skilt ímillum sterkar og veikar fyritøkur. Tað merkir, at sum nú er hevur fíggjarliga grundarlagið hjá fyritøkunum ongan týdning í mun til, um tær kunu fáa stuðul ella ikki - heldur eru hjálparpakkarnir grundaðir á mista inntøku í hesum koronatíðum.

Í hjálparpakka tvey, sum varð samtyktur í gjár, er tó ein áseting, sum skal geva landsstýrismanninum heimild at hyggja nærri eftir hesum viðurskiftum. Ásetingin sigur:

"Landsstýrismaðurin kann nokta at rinda stuðul sambært hesi lóg, um landsstýrismaðurin metir, at viðkomandi fyritøka er fíggjarliga før fyri at rinda tær rakstrarútreiðslur, sum eru fevndar av stk. 2. Landsstýrismaðurin kann í kunngerð áseta nærri reglur um fíggjarligar treytir fyri at fáa stuðul eftir 1. pkt."

Nú eru tveir hjálparpakkar samtyktir politiskt. Tann stóri hjálparpakkin, sum fleiri partar eftirlýsa, manglar tó framvegis - tann, sum gevur endurgjald fyri mistar inntøkur orsaka av koronakreppuni. Og spurningurin er, hvønn leiklut fíggjarligu sterku samtøkini skulu hava framyvir í koronakreppuni.