Sleppur ikki aftur í skúla fyri summarfrítíðina

Sára Michelsen saknar skúlastovuna. Fjarundirvísingin er einasta tilboð til hundraðtals fólkaskúlanæmingar fyri summarfrítíðina

Sára Michelsen er ein av fleiri hundrað fólkaskúlanæmingum, sum ikki sleppa aftur í skúla fyri summarfrítíðina

Krista Johnsdóttir Kreutzmann

Jón Brian Hvidtfeldt

01.05.2020 - 20:07

Tá landsstýrið í gjár boðaði frá, hvussu samfelagið spakuliga letur uppaftur, gjørdist samstundis greitt, at fleiri hundrað fólkaskúlanæmingar sleppa ikki aftur í skúlastovurnar fyri summarfrítíðina. Teirra skúlatilboð er tí avmarkað til fjarundirvísing umvegis telduna.

Talan er um 6., 7., 8. og 10. flokk í fólkaskúlanum, sum ikki sleppur aftur í skúla.

Á tíðindafundi í gjár boðaði løgmaður frá, at 4. flokkur byrjar aftur nú mánadagin 4. mai. 5. flokkur byrjar mánadagin 11. mai og 9. flokkur byrjar aftur mánadagin 18. mai.