Viðhaldsfólk skulu sita í bólkum

Nú sleppa fólk aftur at hyggja at fótbólti við vøllin.

Tað sigur Fótbóltssamband Føroya, eftir at koronatilmælini vóru linkaði fyrrapartin.

Men áskoðararnir skulu býtast upp í bólkar við í mesta lagi 100 fólkum í hvørjum.

Eisini skal ein metur vera ímillum hvønn áskoðara.

 - Tað er bara at hyggja í teir ymisku miðlarnar og teir sosialu miðlarnar, har mann hevur sæð tann brennandi áhugan hjá fólki at sleppa til dyst, so eg vænti, at tað kanska verða serliga nógvir áskoðarar hetta vikuskiftið, sigur Virgar Hvidbro, aðalskrivari í Fótbóltssambandinum.

Umstøðurnar hjá teimum ymsu feløgunum eru ólíkar, og tí er munur á, hvussu nógvir áskoðarar sleppa inn til teir ymsu dystirnar.