Føroyar ætla at spæla seg víðari

Finnland og Ísrael eru mótstøðuliðini, nú føroyska hondbóltslandsliðið við kvinnum spælir undan-undankapping á heimavølli um vikuskiftið.

Vinnarin av kappingini sleppur sjálva undankappingina og fer í bólk B saman við Danmark, Rumenia og Eysturríki.

Vónirnar eru góðar í føroyska hópinum, og 39 ára gamla Poula Berg, sum er við fyri fyrstu ferð, gleðir seg.

 - Venjararnir hava helst sæð okkurt, sum teir hava brúk fyri í hópinum, so tað er gleðiligt. Hóast mann er 39 ár, so kann mann gott koma á landsliðið, sigur Poula Berg, sum hevur spælt væl á meistaraliðnum, StÍF.

Venjarin, Dragan Brljevic, letur væl at fyrireikingunum, og fegnast um, at fleiri av royndu spælarunum eru komnir aftur á landsliðið.

 - Kappingin liggur væl fyri. Vit hava vant í tríggjar vikur við mestsum øllum spælarunum, so vit eru væl fyrireikað, sigur Dragan Brljevic.