Páll Fangi tók Sundabátin

Tað varð tvídystur millum tveir bátar úr norðoyggjum, tá Páll Fangi úr Klaksvík vann á Sundabátinum, sum hevði vunnið ársins fyrsta FM-róður á fjarðastevnu

Símun Christian Olsen

21.06.2021 - 09:58

Sundabáturin fekk góða byrjan upp á kappróðrarárið, tá hann vann ársins fyrsta FM-róður á fjarðastevnu fyri viku síðan.

Tað ferðina vóru fýra sekund niður til Páll Fanga á 2. plássi, og báturin úr Klaksvík lat ikki søguna endurtaka seg í Runavík leygardagin.

- Vit høvdu ræðuliga góðar vónir til hendan róðurin. Vit hava vant hart, og tíðirnar hava verið góðar til venjing, sigur Símun Heinesen av Páll Fanga.

Vónirnar gjørdust eisini til úrslit, tí Páll Fangi vann róðurin, tvey sekund frammanfyri Sundabátin.

- Nú hava teir flestu av okkum róð í trý ár, og hini bæði árini eru vit blivnir nummar trý í FM, so nú ætla vit at verða nummar eitt, sigur Símun Heinesen.

6-MANNAFAR MENN

Nr.	Bátanavn	Tíð	Stig
1	Páll Fangi	05:08.33	7
2	Sundabáturin	05:10.07	6
3	Smyril	05:15.32	5
4	Strálan	05:21.05	4
5	Gongurólvur	05:21.28	3
6	Hósvikingur	05:21.42	2
7	Víkingur	05:22.29	1
8	Hvessingur	05:26.23	0
9	Romvlvs	05:38.47	0
10	Herningur	dns	0