Avmarkað ferðsla í Mykines

-Gevist eg við at sigla eykatúrar, so tekur onkur annar yvir dagin eftir, sigur Tummas Henriksen, stjóri í sp/f Mykines, sum eigur ferðafólkabátin Jósup.

Tummas Henriksen er í eini tvístøðu. Hann rekur farleiðina millum Sørvág & Mykines, sum er ein góð forrætning við eykatúrum hvønn dag í summar. Tað ger hann, samstundis sum hann sær Mykines líða undir nógvu ferðafólkunum í oynni.

Summarið 2019 flutti Jósup 15.000 fólk í Mykines, og harafturat komu ferðandi í oynna við øðrum smærri og størri bátum. Summarið 2020 og summarið 2021 avmarkaði støðan við korona talið av ferðandi í Mykinesi. Men ábendingar eru um, at í summar verða tey ferðandi nærum líka nógv sum metárið 2019. Og áhugin fyri Mykinesi er somikið stórur, at Tummas Henriksen væntar ein støðugan vøkstur í ferðafólkatalinum næstu árini.

Sambært Tummasi Henriksen má politiski myndugleikin stýra – og harvið avmarka – ferðafólkastreymin út í Mykines.

Magnus Rasmussen, landsstýrismaður í ferðavinnumálum, hevur ongar viðmerkingar til støðuna í Mykinesi.