Stjørnan flytur heimanífrá

Stjørnan fer  nú at taka seg úr Klaksíkar Ítróttarfelag.

Á eykaaðalfundi hjá KÍ í næstum verður uppskot lagt fram um, at hondbóltsdeildin, Stjørnan, skal takast burtur úr KÍ.

 - Tað er ikki endiliga tað, at vit vilja sleppa burtur úr KÍ, sigur Súsanna Lydersen, forkvinna í Stjørnuni. 

 - Men lógir og reglur fyri ítróttarfeløg verða strangari og strangari, og vit verða noydd at liva upp til tey. Hetta er so ein avleiðing av tí.

Í roynd og veru hevur Stjørnan í longri tíð virkað sum sjálvstøðugt felag, og eftir nærum eina øld í Klaksvíkar Ítróttarfelag er tíðin komin, heldur forkvinnan.

 - Børn vaksa til, og so flyta tey heimanífrá og verða sjálvstøðug. Nú er Stjørnan 90 ár, og tað er kanska tíð upp á, at mann stendur á egnum beinum og ikki er tongdur at einum øðrum ítróttarfelag, sum hevur eina heilt aðra ítrótt enn hondbólt, sigur Súsanna Lydersen.

Samanlegging liggur ikki kortunum

Stjørnan hevur ongan mannfólkahondbólt havt síðan miðskeiðis í nítiárunum, meðan Team Klaksvík varð stovnað við júst hesum endamáli í 2006.

Feløgini samstarva í løtuni um venjarar í ungdómshondbóltinum, men samanlegging liggur ikki í kortunum í løtuni, sigur forkvinnan.

- Sum er meta vit, at tað er fínt, sum tað er, og at ongin orsøk er at róta í tí, sigur Súsanna Lydersen.