Vil hava tíggju stig

Moldova, Albania, Kekkia og Pólland.

Hesi komu úr UEFA-bollanum saman við Føroyum, tá lutakast var til EM-endaspælið sunnudagin. Ein av málverjunum á føroyska landsliðnum, Teitur Matras Gestsson, heldur, at lutakastið er ikki so galið.

 - Tað er kanska ikki tað mest spennandi lutakastið fyri hyggjaran, tey sum kanska høvdu ynskt sær England ella okkurt tílíkt, sigur hann.

 - Men um hugsa verður um møgulig stig, haldi eg, at tað er nokkso spennandi. 

Vil hava tíggju stig

Sum vera man heldur málverjin, at stigini fyrst og fremst skulu koma til høldar ímóti Moldova, sum Føroyar fekk fýra stig ímóti í seinastu HM-undankapping.

 - Moldova á heimavølli er ein dystur, sum vit skulu vinna, sigur Teitur Matras Gestsson.

Fyrsti dysturin verður ikki á Tórsvølli, men í Chisinau í Moldova, og tað leggur eitt ávíst trýst á føroyingarnar.

 - Tí tað er kanska har, at vit skulu hava stigini. Vit vunnu jú á teimum á heimavølli, og tað er eitt lið, sum føroya fólk væntar, at vit vinna á, sigur málverjin.

Kekkia og Pólland skulu ikki kenna seg trygg

Stóra navnið í bólkinum hesaferð er Barcelona-framherjin, Robert Lewandowski, sum higartil hevur skotið 76 mál fyri pólska landsliðið. Saman við Kekkia er Pólland sterkasta liðið í bólkinum, men Teitur Matras Gestsson heldur ikki, at hesi skulu kenna seg trygg á Tórsvølli.

 - Eg haldi, at í øllum førum tá vit spæla í Føroyum, skulu vit altíð trúgva upp á, at vit kunnu fáa trý stig, sigur málverjin.

 - Eg veit væl, at tað kanska er órealistiskt ímoti Póllandi, men vit sóu ímóti Turkalandi, at tað ber veruliga til, um alt gongur, sum tað skal, og tað skulu vit trúgva upp á.

Teitur Matras Gestsson hevur eitt nokkso greitt mál.

 - Í øllum førum seks stig ímóti Moldova hevði verið ordiliga gott, og so eini trý, fýra stig í hinum dystunum.

EM-undankappingini 2024