Fær neyvan ávirkan á danska valið

Føroyingar skulu atkvøða til Fólkatingið dagin fyri, at danir fara á val. Hetta var greitt um vikuskiftið, tá ein breiður meiriluti av flokkunum í Fólkatinginum valdu at ganga umbønini hjá løgmanni á møti um at flyta valdagin í Føroyum - tí 1. november er minningardagur teirra sjólætnu.

Leygardagin gekk Fòlkatingið umbønini hjá løgmanni á møti um at flyta valdagin til 31. oktober. Altso dagin fyri, at valið er í Danmark. 

Innanríkismálaráðharrin í Danmark metir ikki, at flutti valdagurin í Føroyum fær ávirkan á danska valið. 

Sambært danska Innanríkismálaráðharranum kundi danski forsætisráðharrin ikki vita, at 1. november var ein óheppin valdagur í Føroyum. 

Moderaterne var einasti flokkur, sum atkvøddi ímóti at flyta valdagin. Lars Løkke Rasmussen, formaður í flokkinum, sigur við Kringvarpið í dag, at hann ONKI hevur ímóti, at valdagurin verður fluttur. Men hann heldur, at tann avgerðin skal takast av einum føroyskum meiriluta. 

Út frá teimum upplýsingum, sum Fólkatingið fekk, var umbønin hjá løgmanni ikki umrødd við hinar flokkarnar í Føroyum, og tí tóku Moderaterne ikki undir við umbønini, sigur Lars Løkke Rasmussen altso í viðmerking til Kringvarpið.