Blái Krossur: ávarar ímóti linari rúsdrekkalóggávu

Um fólk fáa lættari atgongd til rúsdrekka, veksur nýtslan eisini. Tað sigur Blái Krossur, sum ávarar ímóti ætlaðu broytingunum á rúsdrekkaøkinum.

Sambært nýggja samgonguskjalinum skulu bryggjarí fáa loyvi at selja alla sína vøru, eisini hana, sum hevur eitt alkoholinnihald omanfyri 5.8 prosent á egnum sølustøðum uttanum Rúsdrekkasølu Landsins.

Hetta tekur Blái Krossur ikki undir við.

 - Vit halda ikki, at mann skal liberalisera. Um vit hyggja at grannalondum okkara Íslandi og Norra, síggja vit, at tey hava eina líknandi skipan, sum vit hava í Føroyum, sum er tálmandi, sigur Dakko Petersen, aðalskrivari í Bláa Krossi.

 - Vit vita, at betri atkoma gevur meira nýtslu, og um tú skalt selja, skalt tú reklamera, og tað kemur at geva størri sølu, og tað taka vit ikki undir við, sigur aðalskrivarin.