Vit verða hart revsaðir

Soleiðis er toppfótbóltur.

Tú kanst vera betri og spæla væl, men um tú ikki ert hvassur í avgerandi løtunum, vinnur tú ikki nógvar dystir.

Nakað soleiðis tók Jóannes Kalsø Danielsen saman um 2-1 tapið hjá KÍ fyri Slovan Bratislava á Tórsvølli, sum sløkti alla vón um víðari luttøku í Conference League.

 - Eg haldi, at vit spæla ein øgiliga góðan dyst, kanska okkara besta í ár, men teir straffa okkum tvær ferðir, og vit fáa ikki bóltin innum. Tí stendur mann sum tapari í fótbólti. Tað er hart viðhvørt, segði høgri vongverjin, sum veruliga gjørdi vart við seg ímóti slovakum.


Ein varði

KÍ byrjaði dystin við fullari ferð og spældi seg til fleiri vandamiklar støður og einstakar stórar málkjansir. Hin størsta fyri steðgin misnýtti Sivert Gussiås, eftir at hann fekk bóltin útfrá.

Lítla løtu seinni eydnaðist kortini Mads Boe Mikkelsen at leggja heimaliðið framum, tá hann tamdi eina langa sending frá Vegard Forren, sneiddi fram við málverjanum og sendi bóltin í netið.

Leiðslan helt kortini ikki leingi. Tá ið 24 minuttir vóru spældir, javnaði Juraj Kucka, og eftir steðgin skoraði sami maður sigursmálið, eftir at Páll Klettskarð hevði misnýtt ein stóran møguleika.

 - Nú stendur mann øgiliga skuffaður, men tá ið vit koma at hyggja aftur á tað, kemur hetta at standa sum ein ordiligur varði hjá okkum, sum vit kunnu taka við okkum bæði í fótbóltslívinum, men eisini í lívinum annars. Vit eru ekstremt ernir av hesum, segði Jóannes Kalsø Danielsen.

Nú er bert útidysturin ímóti Lille eftir, áðrenn KÍ kann hyggja fram ímóti næsta kappingarári.