Traðka út í tað ókenda

Tá Hákun West av Teigum týsmorgunin setir seg í flogfarið við kós ímóti Berlin, flýgur hann í roynd og veru heim.

Tað er jú í týska høvuðsstaðnum, at føroyski vongurin spælir og livir sítt gerandislív, men upp á allar aðrar mátar er talan um eina ferð út í tað ókenda fyri Hákun og liðfelagarnar á føroyska hondbóltslandsliðnum

 - Eg veit faktiskt ikki ordiliga, sigur Füchse Berlin-vongurin og ristir eitt sindur við høvdinum. - Tað einasta, eg kann samanbera tað við, er tað, sum vit hava roynt við U20 og U21-landsliðnum. Vit hava spælt bæði EM og HM, men eg veit eisini, at tað kann ikki samanberast. Tað er eitt heilt annað trýst og uppmerksemi frá hondbóltsheiminum, greiðir Hákun West av Teigum frá.


Savna okkum um spælið

Føroyska hondbóltslandsliðið hevur vant og verið saman síðan beint eftir jól. Hondbóltsvenjingarnar hava fylt mest, sjálvandi, men føroyingarnir hava eisini tikið sær tíð til at vitja stuðlar og skúlar. Á Skúlatrøð í Klaksvík - mitt í fótbóltslandi - mundu teir ikki sloppi avstað aftur, og í dag ber aftur til hjá fólki at heilsa upp á landsliðsspælararnar í høvuðssætinum hjá Bank Nordik í Havn.

Tað er eyðsæð, at hondbóltsfepurin er í hæddini, men spælararnir mugu halda høvdið kalt og savna seg um sjálvt spælið, tá teir bresta saman við Slovenia á Mercedes Benz-Arena hósdagin, sigur Hákun West av Teigum.

 - Teir eru nakrir stórir og tungir spælarar, eitt klassiskt balkan-lið, og um vit ikki eru 100 prosent klárir - serliga í verjuni - so verða vit blástir um koll, sigur Hákun West av Teigum.

 - Vit mugu nokk spæla okkara besta verjudyst higartil. Tað mugu vit sjálvandi eisini ímóti Norra og Póllandi, men í løtuni fokusera vit upp á Slovenia.

Sí samrøðu við Hákun West av Teigum omanfyri