Fimm vindmyllulundir í fimm ár

Ein vindmyllulund skal gerast í Porkeri, tað vil siga vaksa um tað, sum longu er har, ein skal gerast í Klivaløgshaga á Sandi, ein á Glyvrafjalli, ein í Junkarahaga í Kvívík, og tann seinasta verður á Vestfelli í Dali. 

SEV og Umhvørvisstovan hava gjørt eina útbyggingarætlan, hvussu vit gerast hundrað prosent grøn í 2030. Men niðurstøðan í útbyggingarætlanini er, at vit bara vera 92 prosent grøn í 2030. Landsstýriskvinnan sær tó ikki so svart upp á tað.

Tað hevur verið málið í fleiri ár, at Føroyar gerast hundrað prosent grønar á landi í 2030. Men við nýggju útbyggingarætlanini vera Føroyar bara 92 prosent grønar í 2030.

Tað er SEV, Kommunufelagið og landsstýrið, sum hava staðið saman um at tíðarfesta útbyggingarætlanina fyri tey næstu fimm árini. Sjálvt um vit hava upplivað fleiri ferðir áður, at vindmylluútbyggingar eru komnar í drag orsaka av kærum og mótmælum, so trýr landsstýriskvinnan, at útbyggingarætlanin við teimum fimm vindmyllulundunum verður veruleiki.