5-mannafør, kvinnur: Tjaldrið vann við flottum endaspurti

Tjaldrið vann á favorittinum, Firvaldi, í triðja FM-róðrinum hjá fimmmannaførum við kvinnum.

Firvaldur hevði vunnið bæði á norðoyastevnu og á sundalagsstevnu, og tí var fimmmannafarið úr Froðbiar Sóknar Róðrarfelag favorittur at fara avstað við sínum triðja gulli á rað.

Men Tjaldrið vildi tað øðrvísi. Við flottum endaspurti yvirhálaði NSÍ-báturin suðuroyingarnar, og vann bert sjey hundraðpartar framman fyri Firvald.

Nú er bert eitt stig á muni millum teir báðar bátarnar í stríðnum um føroyameistaraheitið.