Bíða enn eftir høllini í Sørvági

Eitt evni, ið hevur verið nógv umrøtt í samband við kommunuvalið í Sørvági, er ein nýggj ítróttarhøll.

Flogbóltur er stóra ítróttagreinin í Sørvági, og bæði menn og kvinnur hjá SÍ hava vunnið mangt gullheiðursmerki til bygdina.

SÍ brúkar framvegis fimleikahøllina í skúlanum, men hon er als ikki nøktandi, og tørvur er á betri hølisviðurskiftum. Tað heldur millum annað Ragnar í Haraldsstovu, sum er venjari hjá SÍ.

Hann vónar, at nýggja bygdaráðið fer at raðfesta høllina, sum hevur verið vallyfti til nógv kommunuval.

 - Tíðin er heilt einfalt farin frá hesi høllini. Hon er frá 1989, og er ótíðarhóskandi til flogbólt í dag, sigur Ragnar í Haraldsstovu.

 - Her er ein bani, og øll okkara lið skulu venja her. Vit hava ikki møguleika at venja fleiri lið samstundis, sum í øðrum hallum, og tí er tað sera trupult at fáa lagt venjingartíðirnar.