Argur málskjútti harmaðist um mista javnleikin

Gunnar Vatnhamar sendi allar føroyingar í dreymaland, tá hann leyp hægri enn Tomáš Souček og javnaði til 1-1 í 83. minutti.

Í níggju dystum ímóti Kekkia var støðan 23-0, men nú høvdu Føroyar fingið fyrsta málið, og javnleikurin hómaðist av álvara. So varð kortini ikki, tí bert tveir minuttir seinni avgjørdi Patrik Schick dystin fyri heimaliðið.

 - Eg eri ræðuliga argur akkurát nú. Tað kendist sum vit fóru at klára at hála ein javnleik heim, og vit høvdu kjansir til mótálop, segði ein vónbrotin málskjútti.

 Verjuspælarin fegnaðist sjálvandi um málið, sum kom eftir horna frá Adriani Justinussen úr høgru. 

 - Hann bombar hann inn fyri, og eg skal bara seta pannuna á. Kenslan var sjálvandi fantastisk í løtuni, men tað er bara ræðuliga keðiligt beint nú, segði Gunnar Vatnhamar.

 - Vit hava ein dyst afturat týsdagin, og vit ætla at fáa trý stig tá. Einki sum eitur.