Elisabeth helt høvdið kalt

Føroyar hava í dag vunnið seks heiðursmerki í svimjing. Tvey av teimum vóru gull og í báðum førum var Elisabeth Erlendsdóttir við. Tað fyrra vann hon sjálv í 100 metur rygg, har hon setti nýtt oyggjaleikamet, meðan tað seinna var í 4x50 metur blandað.

Sermerkt við oyggjaleikametinum á 100 metur rygg var, at Tatiana Tostevin av Guernsey tók oyggjaleikametið frá júst Elisabeth Erlendsdóttir í innleiðandi svimjingini í dag við tíðini 1:00.58. Í kvøld tók Elisabeth Erlendsdóttir metið aftur við tíðini 1:00.26. Tað er somuleiðis føroyskt met.

 - Eg havi svomið móti henni fyrr, men eg visti at hon oftani svimur skjótari um morgunin. Eg skuldi bara halda høvdið kalt og ikki halda, at eg hevði tapt bara tí hon svam skjótari í innleiðandi riðlinum, Elisabeth Erlendsdóttir.

Hon fegnast um, at hava tikið eitt oyggjaleikamet, men hon er sera errin av, at hava tikið føroyska metið hjá Signhild Joensen, ið hevur staðið í fleiri ár.

Elisabeth Erlendsdóttir legði eisini fyri, tá kvinnurnar settu nýtt landsliðsmet og vunnu gull í 4x50 metur blandað. Hinar vóru Lea Osberg Højsted, Bjarta Nolsøe í Lágabø, og Alisa Vestergaard.