Faer Isles Distillery: Dýrir dropar í Kvívík

Summi gleða seg og bíða eftir at kunna opna jólagávurnar undir trænum. Men á Faer Isles Distillery gleða tey seg meira til at tey í mars, kunnu kalla dýru droparnar í Kvívik fyri whisky. Í november, verða fyrstu whiskyfløskurnar væntandi á søluhillum kring heimin. Hetta gleða teir á Faer Isles seg almikið til, sigur Dánial Hoydal, stjóri á Faer Isles Distillery. "Tað er nógv arbeiði og nógvir pengar, sum liggja í arbeiðnum at framleiða hetta whisky. So tað kann man væl siga, at vit gleða okkum," sigur hann við stórum brosi. 

Faer Isles Distillery, Dánjla Hoydal, 16:9

Dánial Hoydal, tá bygningurin í Vestmanna var tikin í brúk

Løgurin liggur í tunnum í Kvívík

Whiskyløgurin liggur á tunnu í bygningum hjá FID í Kvívík. Bygningurin er bygdur eins og ein hjallur. “Eitt av upprunahugskotum okkara var, at whiskyløgurin skuldi búnast í somu umstøðum, sum okkara føroyski matur verður - í einum hjalli. Tí er bygningurin bygdur sum ein hjallur. Tað sæst uttanfyri og inni er eingin hiti. Umstøðurnar, sum whisky búnast í, hevur stóran týdning, so hetta er sjáldsamt.”

Tað eru nógv sum framleiða whisky kring heimin, so hvat er tað sum ger akkurát tykkara so serligt, spurdu vit. "Vit hugsaðu at byrja við, at Føroyar hevði verið gott stað at gjørt whisky. Í Skotlandi tosar man um at har er gott tí at veðurlagið er tað rætta - har er rætta luftvæta, rættur og javnur hiti, vindur o.s.fr. Vit hava alt tað og meira, so whisky í Føroyum kundi bara bera betri.”

Til sølu í november

Ætlanin er, at teirra whisky skal vera á 12 marknaðum, tá tað kemur út fyri fyrstu ferð í november. "Vit eru nú á 7, og eru í samskifti við fleiri, so tað er realistiskt." Teir selja aðrar vørur frammanundan, millum annað vodka og ginn, sum hava verið væl umtókt og hava fingið fleiri prísir. 

Faer Isles Distillery hava sent smakkiroyndir at til fakfólk innan whisky, sum lata væl at. “Tað er gott at vita, at tað vit gleða okkum at selja, eisini er gott,” sigur Dánial Hoydal