Smá mistøk kosta dýrt

Øll tey smáu mistøkini kostað dýrt, tá tú spælir ímóti teimum bestu í Evropa, og Slovenia telist millum hesi, segði Pauli Jacobsen eftir 30-27 tapið í Unity-leikhøllini, sum sendi Føroyar út úr EM-kappingini.

 - Og tað, sum avgerð hendan dystin til endans, er at málverjin hjá teimum stendur ekstremt væl og hevur nakrar risastórar bjargingar, men tað er ein partur av ítróttinum, segði Pauli Jacobsen um starvsbróðurin Miljan Vujovic í slovenska málinum, sum endaði við einum bjargingarprosenti upp á 43%.

Elias Ellefsen á Skipagøtu minkaði til 16-15 við brotskasti beint fyri steðgin, og fyrsta løtan av seinna hálvleiki var sera góð. Við trimum skjótum málum frá Óla Mittún og Hákuni West av Teigum løgdu Føroyar seg framum 18-16, og Pauli Jacobsen iðraði seg um, at tað ikki eydnaðist at byggja á tað.

 - Ja, men tað endar við at teir fáa nøkur brotskøst og skora okkurt í tómt mál, meðan vit brenna. Dysturin fer eitt sindur frá at handla um at spæla hondbólt til at ganga nokkso skjótt aftur og fram. Tað drepur okkum eitt sindur. Vit koma ikki ordiliga í gongd aftur og fáa ikki "flow" í spælið, viðgekk liðskiparin, sum gleðir seg til nýggjar endaspælsroyndir.

 - Vit eru ernir av okkara avriki, og tað er tað týdningarmesta. Vit hava fingið nakrar góðar royndir, og vit royna allir at blíva  betri og betri fyri hvønn dag. Vit ætla okkum longur enn hetta. Tað er okkara greiða mál, segði Pauli Jacobsen.