Fagnaðurin 25: Anja framdi ársins comeback

Átta ár vóru síðan síðst, men tað sást ikki á skjótibreytini á Orknoyggjum. 

Anja Eydnudóttir vann fimm gull á leikunum á Gotlandi í 2017, og eftir átta ára langan steðg hevði hon leitað sær bogan framaftur. Longu í fyrstu kappingini kom fyrsta gullið. Tað var ein stór løta fyri skjúttan. og føroyska bogaskjóting. 

 - Oh my God, hon var óverulig. Í akkurát tí kappingini vil eg ikki vita úrslitini, tí so gangi eg og hugsi um, at so má eg fáa tað og tað, og tað riggar fínt hjá mær, sigur Anja Eydnudóttir eitt hálvt ár eftir leikirnar. 

 - Men so stóð onkur og rópti aftanfyri meg og sigur 'Anja, tær nýtist ikki at skjóta teir síðstu pílarnar. Tú hevur vunnið allíkavæl', og tað anaði eg ikki. So tá fór eg upp at ristast.

Nýggjur bogi - nýggj mál

Eingin orsøk var kortini at vera risthent. Við tilsamans fýra gullmerkjum og einari silvur skeyt hon næstan eins væl og í Gotland á sinni. Nú hevur hon keypt sær spildurnýggjan boga, og við honum koma nýggj mál.

 - Bara tað, at eg eri byrjað aftur, er ordiliga deiligt. Tað er gott fyri mína sál, sigur Anja Eydnudóttir.

 - Eg ætli mær at royna EM uttandura, sum verður í Turkalandi í mai. Mær dámar betri at skjóta uttandura. 

Eins og fleiri av hinum føroysku íðkarunum hevur hon sera góðan hug at skjóta á oyggjaleikunum í Føroyum næsta ár, og tá ætlar hon sær uppaftur á fimm gull.

 - Tað vil eg hopa. Nú havi eg hug til at seta mær tað málið, at tað skal vera fimm, sigur bogaskjúttin.

Hetta innslagið var við í Ítróttafagnaðinum 2025. Sí sendingina her: