SÍ tryggjaði sær finalufyrimunin

SÍ vann 3-0 á Mjølni í síðsta umfari í bestu flogbóltsdeildini við monnum og fór avstað við fyrsta plássinum.

Hetta merkir samstundis, at sørvingar fáa heimavøll í fyrstu finaluni og fyrimunin av heimavølli í eini møguligari 3. finalu um føroyameistaraheitið.

Bæði fyrsta og annað sett vóru jøvn frá byrjan, men so líðandi vann útiliðið sær eina leiðslu, sum klaksvíkingar ikki kláraðu at taka aftur.

Triðja sett var spennandi. Mjølnir var aftanfyri, men bardi seg upp á 24-24 og yvirlivdi harafturat tveir settbóltar. 

Men so gekk ikki longur. Blokkurin hjá SÍ avgjørdi stigið, settið og dystin, og sørvingar tók fyrsta plássið í deildini.

SÍ og Mjølnir bresta saman í FM-finalunum hjá monnum.