Grindamannafelagið meldar "slóðarar"

Í sambandi við uppskeringina av grindini, ið legði beinini í Sandavági í gjár, var ein fremmandur lutur funnin, har rovini av grindini lógu.

Hetta vakti stóra undran.

Kári Thorsteinsson, sýslumaður, visti ikki rættiliga hvat tað, ið varð givið honum á bryggjuni í Miðvági í dag.

Talan var um ein slóðara, sum kann geva boð frá sær til onnur, og siga júst hvar hann er.

Málið verður meldað

- Vit melda hetta málið eins og tað við grindastyggjarunum, sigur Ragnar Jacobsen, formaður í Grindamannafelagnum.

Slóðararnir vórðu funnir í einum kassa av grindarovum, sum koppaði. Slóðarin, vit sóu, er virkin og sendir út boð.

- Helst er tað onkur, ið vil fylgja við, hvar grindarovini enda. Mær vitandi er tað ólógligt at hava yvirvaking, sigur Ragnar Jacobsen.

Hann upplivdi, at meðan hann hevði slóðaran í bilinum, var ein fremmandur bilur, ið fleiri ferðir koyrdi aftur og fram framvið honum.

Tikið væl upp

Tað varð tikið væl upp eftir grindina, sum legði beinini í Sandavági í gjár.

Umframt at øll fólk í Vágum fingu part, fóru nakrir fáir hvalir til Klaksvíkar og Runavíkar.