Fleiri brýr illa farnar

Fleiri brýr eru í ringum standi. Tað er støðan millum annað við Fjarðará í Skálafirði, har brúgvin heilt einfalt má skiftast út, tí hon ikki er hildin við líka.

Brúgvin er millum teirra, sum fáa vánaligt próvtal frá Landsverki, sum meta um standin á brúnum.

Landsverk metir um standin við støði í einum stiga frá null til fimm, har fimm merkir, at brúgvin ikki kann brúkast.

Tilsamans eru 30 brýr, sum fáa eitt fýra tal frá Landsverki, sum merkir, at tær hava átrokandi tørv á umvæling.

Í 2018 metti Landsverk, at tørvurin á játtan til viðlíkahald av landsvegakervinum var 375 milliónir krónur.

Talið er nú munandi hægri, sigur Fríðrik Heinesen, sivilverkfrøðingur hjá Landsverki, sum nú ger nýggja meting av tørvinum á játtan til viðlíkahald.

Við Fjarðará í Skálafirði og við brúnna um Streymin hevur Landsverk avmarkað ferðsluna, soleiðis at sertung ferðsla ikki kann fara um brýrnar.

Sí innslag í Degi og viku.