Framvegis fá børn og ung koppsett fyri HPV

Heilsustýrið er í hesum døgum farið undir nýtt átak, sum skal kunna um HPV-koppsetingina.

Endamálið er at fáa fleiri at taka av koppsetingini fyri HPV, sum kann elva til krabbamein.

Fleiri ikki koppsett fyri HPV

Okkurt um helvtin av 15 ára gomlum gentum eru koppsettar, vísa fyribils tøl hjá Heilsustýrinum.

Hetta er munandi færri, samanborið við grannalondini, sum liggja um 80 og 90 prosent. Til samanberingar hava 93 prosent av børnum og ungum í Íslandi fingið koppsetingina.

Málið hjá heimsheilsustovninum WHO er, at 90 prosent eru koppsett, áðrenn tey eru 15 ár. Talan er um fyribils tøl hjá Heilsustýrinum, sum nú ger upp tølini fyri koppsett børn og ung í 2025.

Í fjør gjørdi Heilsustýrið vart við, at undirtøkan fyri HPV-koppsetingini er minkað seinastu árini. Uppgerðin, sum tók støði í tølum frá 2024, vísti, at færri dreingir og gentur millum 12 og 16 ár seinastu árini eru koppsett.

- Vit hava ikki ábendingar um, at støðan er nógv batnað, síðani seinastu uppgerð, sigur Katrin Eivindardóttir Christiansen, fulltrúi í Heilsustýrinum.

Kunningarátak skal venda gongdini

Undirtøkan fyri HPV-koppsetingini er lítil. Tí er Heilsustýrið nú farið undir nýtt kunningarátak við áheitanini "Tvey prik móti krabba".

HPV-smittan kann elva til fleiri sløg av krabba. Tí heitir Heilsustýrið á foreldur um at taka av koppsetingini.