Tvøramenn róðu frá vágbingum á fjarðastevnu

Smyril úr Vági hevur verið í serflokki hjá 6-mannaførum við monnum í summar, men Froðbingur av Tvøroyri svaraði aftur við manér á fjarðastevnu.

- Nú segði eg við teg seinast, at nógv kundi broytast upp á tvær vikur, so vit fóru heim at hyggja at, hvat skuldi broytast, og tað hevur riggað, segði Tóti Johannessen á Froðbingi.

Tvøramenninir hava serliga savnað seg um miðróðurin - ella lunnin, sum Tóti Johannessen málbar seg, tí har stóð væl til frammanundan. Hesa ferð riggaði so uppaftur betri.

Harumframt stakk Strálan seg fram ímillum teir báðar suðuroyarbátarnar, so Smyril mátti taka til takkar við 3. plássinum hesa ferð.

Tað hevur við sær, at spenningurin í FM-stríðnum er sera stórur, nú tríggir róðrar eru eftir. Froðbingur hevur 25 stig - eitt minnið enn Smyril, sum framvegis er fremstur samanlagt við 26 stigum.