Væl nøgdir oyggjaleikagestir

Umstøðurnar fingu góð skotsmál, tá umboð fyri mestsum allar oyggjarnar, sum skulu kappast á oyggjaleikunum næsta summar, vitjaðu í Føroyum farna vikuskiftið.

Andrew Inkster, formaður í altjóða oyggjaleikanevndini, IIGA, var væl nøgdur við tað, sum hann sá, og tað vóru umboðini fyri Gibraltar og Jersey eisini, sum 3-2 tosaði við, eisini.

Tey vóru væl nøgd við gistingarmøguleikarnar, sum ofta eru ein avbjóðing á oyggjaleikum, men serliga góð skotsmál fingu leikvallir, hallir og svimjihylar.

 - Kappingarumstøðurnar eru frálíkar, og vit hava ikki sæð betur á nøkrum oyggjaleikum yvirhøvur, segði Madeleine Lee av Jersey, sum er fyrrverandi tennisspælari og heiðursmerkjavinnari á oyggjaleikum.