Fornminni funnin við Skansan

- Her eru ymisk ting, men hetta her er øgiliga áhugavert, tí hetta vísir beinleiðis til tá bretar vóru her, hetta eru patrónir, har tað stendur árrtal á, 1940 stendur her, sigur Helgi Michelsen, leiðari á fornfrøðideildini á Tjóðsavni Føroya.

Múrurin um Skansan skal umvælast av tí at partar av honum eru bólgnaðir somikið nógv út, at vandi er fyri, at hann kann rapa. Ætlanin er at taka partar av múrinum niður so hvørt, fyri síðani at laga hann upp aftur av nýggjum. Men áðrenn grótið verður tikið niður, má moldin innanfyri gravast frá. Og haðani koma fornfrøðiligar leivdir. 

- Tað sum vit vóna er, at vit kunnu koma at síggja eldri fasir av Skansanum. Og har er tað nemliga, at vit kunnu brúka hesar gripirnar at fortelja okkum, hvørjum tíðarskeiði vit eru í, sigur Helgi Michelsen.

Skansin varð bygdur í 16. øld eftir boðum frá Magnus Heinason, og hevur verið karmur um ymiskt hernaðarligt virksemi. Eisini hevur skansin virkað sum politistøð, pakkhús og fongsul.