Mannligur sjúkrarøktarfrøðingur missir ikki viðbót

Einasti mannligi sjúkrarøktarfrøðingurin í leiðandi starvi á Landssjúkrahúsinum hevur ikki mist serligu førleikaviðbótina, sum umleið 25 leiðandi sjúkrarøktarfrøðingar kring landið - kvinnur - hava mist.

Eitt mistak, sigur sjúkrahússtjórin, sum er farin at endurskoða og kanna, um manligi sjúkrarøktarfrøðingurin eisini skal missa førleikaviðbótina. Hann vísir aftur, at Landssjúkrahúsið ger mun á monnum og kvinnum.

Leiðslan á landssjúkrahúsinum fór undir at endurskoða málið, tá Kringvarpið setti seg í samband við tey.

Felagið Føroyskir sjúkrarøktarfrøðingar fór í vár í Gerðarrættin við málinum um mistu førleikaviðbótini hjá øllum teimum 25 sjúkrarøktarfrøðingunum, sum hava fingið fráboðanarskriv um, at tey missa førleikaviðbótina.

Gerðarrætturin viðger tó ikki spurningar um brot á javnstøðulógina - einans arbeiðsmarknaðarósemjur.