Kunnu ikki brúka Windows XP í netbankanum

Túsundtals fólk sleppa ikki inn á netbankan hjá sær eftir 14. juli. Tað er, um tey ikki skifta teldu ella stýrisskipan á telduni frammanundan.

Tað boðar felagið Føroyskir peningastovnar frá.

Øll, sum hava Windows XP-stýrisskipanina á telduni, missa atgongdina. Orsøkin er, sambært Føroyskum peningastovnum, at Windows XP ikki longur verður trygdardagførd. Tí er vandi fyri, at teldan verður fongd við virusi, ella at óviðkomandi fáa atgongd til netbankan.

Felagið Føroyskir peningastovnar metir, at millum 2000 og 3000 netbankabrúkarar brúka Windows XP.

Rúni Heðinsson er KT ábyrgdari hjá Suðuroyar Sparikassa.