Hava áhuga at keypa allan Eik banka

TF Holding hevur áhuga at keypa seinasta partin av Eik Banka frá Fíggjarligum støðufesti, sum framvegis eigur 30 prosent av bankanum.

Men eru ongar ítøkiligar ætlanir um tað, sigur Súni Schwartz Jacobsen, forstjóri í TF Samtakinum.

TF Holding Samtakið væntar sær nógv størri vinning í ár enn væntað varð, tá árið byrjaði. Tá 2013 endaði varð mett, at úrslitið eftir skatt í 2014 fór at verða 70-100 mió. kr. Men góða gongdin fyrra hálvárið ger, at nú væntar samtakið millum 140 og 160 milliónir í avlopi, sigur Súni Schwartz Jacobsen, forstjóri í TF Samtakinum.

Fíggjarligt støðufesti eigur framvegis 30 prosent av bankanum, og teir fáa 23 mió. kr. av úrslitinum fyrra hálvár.