Vil hava frágreiðing um útbjóðing hjá Taks

Fyritøkur undrast á handfaringina hjá Taks, sum avgjørdi at taka av DÝRASTA tilboðnum, tá stovnurin skuldi keypa innbúgv til nýggju skrivstovuhølini á Skálatrøð.

- Okkara vøra stendur mát við allar standardir, sigur Christian Nagata, stjóri í Nema, sum átti nógv lægsta tilboðið, men kortini tapti kappingina.

- Um Fíggjarmálaráðið ikki ger skjótt av og tekur Taks av ræði í hesum málinum, so fer alt trúvirði úr almenna útbjóðingar-politikkinum, sigur Birgir Andreasen, stjóri í Idé Møblum.

Kringvarpið hevur eisini tosað við Jørgen Niclasen, landsstýrismann í fíggjarmálum.

- Málið er púra nýtt fyri mær og Fíggjarmálaráðnum. Eg havi biðið Taks um at geva mær eina frágreiðing beinanvegin, sigur Jørgen Niclasen.

Landsstýrismaðurin í fíggjarmálum vil ikki gera fleiri viðmerkingar, fyrr enn hann hevur fingið frágreiðingina frá Taks.