Við nýggju stýrisskipanini, sum skal samtykkjast næsta ár, skal vera lættari at senda politisk mál til fólkaatkvøðu.

Hugskotið er ikki nýtt. Í álitinum um føroyska stjórnarskipan, sum var latin landsstýrinum tann 22. desember 1993, var ein grein 16 um minnilutaverju, har ein triðingur av løgtingslimum kundi biðja løgtingsformannin um fólkaatkvøðu um eitt lógaruppskot. 

Ásetingin varð seinni tikin burtur. Ein grundgeving var, at ein minniluti skuldi ikki hava so fast tak á einum meiriluta í einum fólkavaldum tingi. Tað var eisini sagt, at tingfólk eru vald at taka avgerðir vegna fólki. Vandin við hesari minnilutaverjuni var, at lógararbeiðið bleiv blokerað.

Men nú skal ásetingin vera við í nýggju stjórnarskipanini.

Stjórnmálafrøðingurin Regin Berg heldur, at hugskotið er gott.

- Henda ásetingin kann hava við sær, at tá politiska mál verða fyrireikaði, verður tú noyddur til at grundgeva fyri uppskotinum og finna eina semju, sigur hann. 

Bárður á Steig Nielsen, formaður í Sambandsflokkinum, heldur, at tað kann elva til, at politiska skipanin verður minni virkisfør.

- Soleiðis, sum samgongan og andstøðan hava virkað í Løgtinginum, er vandi fyri, at annaðhvørt mál fer til fólkaatkvøðu, sigur hann.

Bretar skulu taka støðu

Í Bretlandi skal fólkaræðið eisini flytast nærri fólkinum. Tað halda tey, sum vilja hava Bretland burturúr ES.

- Bretar halda heilt einfalt, at innflytarapolitikkurin í Evropa er miseydnaður, sigur Sólvit Nolsøe, stjórnmálafrøðingur, sum tekur saman um valstríðið til fólkaatkvøða tann 23. juni.

Áki Johansen, sendimaður í London, vísir á, at gera bretar burturúr evropeiska felagsskapinum uttan at vera í tollsamgongu við ES, kann tað bera við sær, at Føroyar skulu gera handilsavtalu við Bretland.

Teir, sum luttaka í sendingini, eru: Regin Berg, stjórnmálafrøðingur, Høgni Hoydal, formaður í Tjóðveldi, Jógvan á Lakjuni, tingformaður fyri Fólkaflokkin, Bárður á Steig Nielsen, formaður í Sambandsflokkinum, Sólvit Nolsø, stjórnmálafrøðingur, Áki Johansen, sendimaður í London, og Bjarni í Liða, búskaparfrøðingur.