Ein føroysk stjórnarskipan skal staðfesta, at Føroya fólk hevur valdið í Føroyum. Tað er ein av ásetingunum í samgonguskjalinum hjá sitandi samgongu. Fólkaatkvøða skal vera um eina nýggja stjórnarskipan í 2017.

Uppskotið byggir á stjórnarskipanaruppskotið frá 2010, sum hevur verið á tingið tvær ferðir uttan at koma úr nevnd aftur – fyrst í 2010 og so í 2011.

Aksel V. Johannesen, løgmaður, vónar kortini, at ein víð semja fæst í lag hesa ferð, men tað valdast, um tað eydnast at fáa semju millum Tjóðveldi og Sambandsflokkin um orðingarnar í formælinum til lógina.

Í 2011 vildi Tjóðveldi ikki taka undir við uppskotinum, tí ein orðing í formælinum staðfesti, at vit virða galdandi reglur, lógir og stjórnarsáttmálar. Tá tók Sambandsflokkurin undir við uppskotinum, sum ongantið kom úr nevnd.

Spurningurin er, um tað eydnast løgmanni at finna eina orðing, sum allir partar kunnu góðtaka, so uppskotið kann berast í tingið. Hetta skal helst gerast í seinasta lagi í november, skal tað eydnast at senda uppskotið til fólkatkvøðu í 2017, tí tað skal viðgerast í eini §25-nevnd í nakrar mánaðir, og síðani skulu ganga seks mánaðir, áðrenn lógin kann fara til fólkaatkvøðu.

Í hesum Radaranum kanst tú hoyra eina longri samrøðu við løgmann um, hví vit skulu hava eina stjórnarskipan, hvørjar ásetingar hon millum annað hevur, og kjakið millum formannin í Sambandsflokkinum, Bárð Nielsen, formannin í Tjóðveldi, Høgna Hoydal, og Poul Michelsen, formann í Framsókn.