Stjórnarkreppan kann enda við nývali

Í Íslandi er stjórnarkreppa. Flokkurin Bjørt framtíð tók seg úr stjórnini í gjár, og nú eru bara Sjálvstæðisflokkurin og Viðreisn eftir.

Kreppan er komin í, tí formaðurin í Bjartari framtíð, Óttarr Proppé kann ikki góðtaka, at pápi Bjarna Benediktsson, forsætisráðharra, hevur skrivað undir eitt bræv, sum viðmælir, at ein maður, ið er dømdur fyri at gera seg kynsliga inn á børn, verður reinsaður.

Tað er álitisbrot, at forsætisráðharrin ikki hevur boðað stjórnini frá hesum, áðrenn tað frættist í fjølmiðlunum, sigur Óttarr Proppé við islendskar miðlar.

Petur Petersen, sendimaður í Reykjavík, sigur, at forsætisráðharrin hevur nú tríggjar møguleikar.