Norðoyggjarnar og Eysturoyggin verða fyri vanbýti

Andstøðan finst hvassliga at ætlanini um at luta út 8,5 prosent í menningarkvotum.

Í broytingaruppskotinum hjá samgonguni verða serliga fimm øki nevnd, sum kunnu fáa menningarkvotur. Tey eru Norðstreymoy, Suðurstreymoy, Vágar, Suðuroy og Sandoy, tí hesi økini lúka krøvini um minkandi fólkatal, høgt arbeiðsloysi ella hava avmarkað tilfeingi.

Eysturoyggin og Norðoyggjarnar verða eisini nevndar. Tey kunnu fáa stuðul í tann mun, tey lúka ásettu treytirnar.

Avleiðingin verður, at Eysturoyggin og Norðoyggjarnar onki fáa, sigur Bjørn Kalsø, tinglimur í Sambandsflokkinum.

Bjørt Samuelsen, forkvinna í Vinnunevndini vísir hesum aftur.