Ráðstevna um rekruttering: Góðar søgur úr fiskivinnuni skulu til

Føroysku fiskiskipini hava í nógv ár havt trupult við at fáa manning, og ein av orsøkunum er, at ov fáir ungir føroyingar velja fiskivinnuna sum vinnuveg. Tað sigur Jan Højgaard, formaður í Fiskimannafelagnum, í sambandi við norðurlendska ráðstevnu um framtíðarinnar fiskivinnu, sum í dag var í Kongshøll í Havn.

Sambært Jan Højgaard hevur trotið á føroyskari manning havt fleiri keðiligar avleiðingar, millum annað, at skip ikki eru sloppin til fiskiskap, tí tey hava manglað fólk.

Negativ umtala av fiskivinnuni er ein orsøk til, at nógv ung halda seg aftur at velja sjógvin sum vinnuveg, heldur hann. 

Norski Leif Harald Hanssen, verkætlanarleiðari, sum arbeiðir við rekruttering í norsku sjóvinnuni, hevði eitt upplegg á ráðstevnuni, og eisini hann leggur dent á, at tað eru tær góðu søgurnar úr fiskivinnuni, ið skulu fram fyri at kveikja hugin hjá ungum til sjólívið.

Føroyski formansskapurin í fiskivinnusamstarvinum í Norðurlendska Ráðharraráðnum skipaði fyri ráðstevnuni, har stovnsrøkt var í brennideplinum. Sambært fyrireikarunum var endamálið við ráðstevnuni at viðgera, hvussu framtíðar samfeløg kunnu fáa sum mest virði burtur úr havsins tilfeingi.

Hoyr innslag í útvarpstíðindunum klokkan 18: