Enniberg havt vakmyndatól í 28 ár

Enniberg hevur havt vakmyndatól á dekkinum síðani skipið kom fyri 28 árum síðani. Tað sigur Kaj Johannesen, reiðari á Ennibergi. 

Tað var eftir áheitan frá arbeiðsformonnum á Ennibergi, at vakmyndatól vórðu sett upp í verksmiðjuni. Slík tól lætta nógv um arbeiðsgongdina.

Bara skiparin og stýrimenn síggja upptøkurnar, og tær verða ikki goymdar, sigur Kaj Johannesen. Og hann leggur afturat, at hava tey í reiðarínum gjørt ein fótfeil, sum hann tekur til, so verður hann rættaður.

Skulu boða frá myndatólum

Dátueftirlitið hevur onga formliga kæru fingið um vakmyndatólini á verksmiðjuni á flakatrolaranum Ennibergi og fær tí einki sagt um málið sum er. Men Dátueftirlitið kann taka mál upp av sínum eintingum.

Eingin má seta upp og tendra vakmyndatól uttan fyrst at boða Dátueftirlitinum frá.

Ein í manningini á Ennibergi, sum undirskrivar seg "ein av gott 40 monnum, ið er undir eftirliti hjá P/F Ennibergi" sendi í gjárkvøldið eina kunning til Fiskimannafelagið, Fiskimálaráðið og fjølmiðlarnar um vakmyndatól á fabrikkini á Ennibergi.

Tá mannningin mynstraði 24. januar, vóru vakmyndatól sett upp ymsa staðni á fabrikkini millum annað yvir skráskerarunum, yvir reinskeringarborðunum og yvir pakkiborðinum. 

Hetta hendi, uttan at manningin fekk nakað at vita um tað frammundan og uttan at nøkur kunning er um hví, og um hvør hevur atgongd til myndirnar, stendur í almannakunngjørdu kunningini.

Vilja síggja, hvat hendir

Mortan Johannesen, sum var reiðari á Ennibergi, váttar á Vágaportalinum, at vakmyndatólini eru har fyri at skiparin kann síggja, hvat hendir umborð. 

Hann sigur eisini, at neyðugu loyvini eru við at koma undir land. 

Jan Højgaard, formaður í Fiskimannafelagnum, sigur, at hann í morgun hevur skrivað til Dátueftirlitið og biðið um, at vakmyndatólini verða tikin niður, áðrenn Enniberg fer nýggjan túr í morgin.

Rógvi Reinert, aðalstjóri í Fiskimálaráðnum, sigur, at hann fer at hyggja upp á brævið.