Væntar enn stuðul frá Jógvani Skorheim

Løgmaður, Aksel V. Johannesen, sigur, at samgongan gjørdi í sínari tíð eina avtalu við Sjálvstýri og ikki við tveir einstaklingar. Fyri seg er tað útgangsstøðið ikki broytt, og at galdandi avtalan er framvegis við flokkin. Tí væntar han stuðul frá Jógvani Skorheim.

Fluttu arbeiðspláss úr Eysturkommunu til Klaksvíkar

Ónøgdin hjá Kára P. Højgaard snýr seg um virknis- og tilhaldsstaðið "Gloym meg ei", ið herfyri flutti úr Norðragøtu til Klaksvíkar. Eysturkommuna segði leigumálið við stovnin upp, og Klaksvíkar kommuna gjørdi skjótt av og bjóðaði teimum hølir í Klaksvík.

Við tí fóru 10 almenn arbeiðspláss úr Eysturoynni og til Klaksvíkar. Jógvan Skorheim fegnast um nýggja tilboðið, ið er komið til Klaksvíkar, meðan Kári P. Højgaard er firtin um, at fleiri almenn arbeiðspláss fara úr Eysturoynni, har fá eru frammanundan.

Hetta sigur Kári P. Højgaard verða avtalubrot, tí semja var við samgonguna um, at varðveita tey almennu arbeiðsplássini í Eysturoynni og kanska leggja afturat.

Ikki avgerandi atkvøðan

Aksel V. Johannesen sigur, at í samband við semjuna um fíggjarlógina og um pensjónsnýskipanina, vórðu avtalur gjørdar við Sjálvstýri at almenna virksemi skuldi breiðast um alt landið.

Málið um virknis- og tilhaldsstaðið, sum flutti úr Norðragøtu til Klaksvíkar, er tó ikki fevnt av tí avtaluni, tí tað er ikki vanligt, at slík mál verða viðgjørd politiskt.

Hoyr løgmann greiða frá omanfyri.