8 av 10 kommunulæknastørvum ikki sett

Enn eru átta av teimum tíggju kommunulæknastørvunum, sum vórðu lýst leys at søkja í juni, ikki sett.

Tríggjar umsóknir komu inn til størvini, og Heilsutrygd hevur sett tvey av størvunum, sigur Egil á Bø, stjóri í Heilsutrygd. 

Fleiri túsund hava ongan fastan lækna

Tað eru 1.090 fólk í Havn, sum enn ikki hava nakran lækna og ikki eru knýtt at nakrari viðtalu yvirhøvur. 13.176 hava ikki fastan kommunulækna, men eru tilknýtt avloysarum. Tey búgva í Suðuroy, Fuglafjarðar læknadømi, Skálafjarðar læknadømi og Suðurstreymoyar læknadømi.

Í juni søkti Heilsutrygd eftir 10 kommunulæknum. Trý søktu. Tvey av teimum størvunum eru nú sett, og Heilsutrygd viðger í løtuni triðju umsóknina. 

Tað merkir, at í løtuni hava 37.153 fólk egnan lækna, og 1. oktober hava umleið 1.500 afturat egnan lækni, sigur Egil á Bø, stjóri í Heilsutrygd. Tá tekur Amalia Danielsen yvir viðtaluna hjá Freddie Poulsen í Berjabrekku. 

Mangla kommunulæknar allastaðni

33 viðtalur eru í Føroyum, og frá 1. oktober eru 25 læknar settir.

Tað mangla trýggir kommunulæknar í Havn, tveir í Suðuroy, tveir í Skálafjarðar læknadømi og ein í Gøtudali í Fuglafjarðar læknadømi. 

Fyri at nøkta tørvin mugu tvær viðtalur upprættast afturat. Onnur viðtalan skal upprættast í Havn og onnur í Norðoyggjum

Tað er óvist, nær tað verður, sigur Egil á Bø.

Tey, sum ongan lækna hava mugu ringja til onkran annan lækna og vóna at sleppa framat har, men tað er upp til læknan, um viðkomandi sleppur framat, sigur Egil á Bø.

Nýggju viðtalurnar verða mannaðar við avloysarum.