Klaksvíkar Kommuna er trek

Bakkafrost hevur í 10 ár roynt at fáa eitt egnað øki til landstøð í Klaksvík, men hvørki undanfarna ella sitandi samgonga hava megnað at útvega eina varandi loysn. Tað sigur Regin Jacobsen, stjóri í Bakkafrosti.

Eftir hansara tykki er tað ikki nóg gott, at ein kommuna ikki megnar at tryggja vinnuni hesar karmar.

Bakkafrost hevur seinastu árini havt eina landstøð við ferjuleguna í Klaksvík, men Heilsufrøðiliga Starvsstovan hevur boðað frá, at hon ikki longur vil góðkenna støðina, og at Bakkafrost tí noyðist at útvega sær eina nýggja støð.

Mikukvøldið samtykti Klaksvíkar Býráð at samtykkja sáttmála við Bakkafrost um at brúka eitt øki á vestaru bryggju til landstøð.

Hetta inniber, at umleið 50 metrar av keikantinum skulu hegnast inni næstu 18-22 mánaðirnar.

Enn er sáttmálin millum Klaksvíkar Kommunu og Bakkafrost ikki undirskrivaður. Millum annað hava partarnir ikki endaliga ásett leiguprísin, sum Bakkafrost skal gjalda fyri økið.