- Tíðindi, mentan og ítróttur
Aðalstjóri: Uppsøgnin tikin til eftirtektar
Atfinningarnar móti Heilsumálaráðnum fyri ikki at duga at stýra heilsuverkinum rína ikki við aðalstjóran í ráðnum.
-Vit hava ikki somu fatan av støðuni, sigur Turid Arge, sum tó harmast um at Jóanis Erik Køtlum segði upp eftir bara 14 mánaðum í starvinum.
Í Heilsumálaráðnum ætla tey tó at umrøða støðuna og tær atfinningar, ið eru vendar móti ráðnum.
Í uppsagnarbrævinum, Jóanis Erik Køtlum sendi landsstýriskvinnuni Sirið Stenberg og aðalstjóranum Turid Arge fríggjakvøldið 8. mars, skrivar hann millum annað soleiðis:
"Dropin, sum fekk bikarið at flóta yvir, var fundurin í dag um játtanina 2018 og 2019, har eg enn einaferð upplivi eitt stórt misálit á meg sum stjóra"
Uppsagnarbrævið er stutt, men bersøgið - sjúkrahússtjórin sigur seg ikki kunna arbeiða.
Í uppsøgnini skrivar Jóanis Erik Køtlum um tað ógvuliga vánaliga samskiftið, ið er millum seg og Heilsu- og Innlendismálaráðið.
Eisini Tummas í Garði, yvirlækni og fyrrverandi læknastjóri, hevur hvassar atfinningar móti Heilsumálaráðnum:
"Ráðið hevur ongan heilsufakligan førleika, ráðið hevur ikki álit á sjúkrahúsleiðsluni, og harafturat stýrir aðalráðið heilsuverkinum niður í smálutir" - ljóðar skotsmálið frá Tummasi í Garði.
Turid Arge, aðalstjóri í Heilsu- & Innlendismálaráðnum, vísir øllum atfinningum aftur. Spurd, um ráðið umhugsar at biðja Jóanis Erik Køtlum koma aftur til arbeiðis, svarar Turid Arge:
-Vit hava fingið eina uppsøgn, og hon er tikin til eftirtektar. Eg havi ikki fleiri viðmerkingar.
Hoyr samrøðu við Turid Arge við at trýsta á pílin undir myndini. Samrøðan var í útvarpstíðindunum á middegi fríggjadagin 15. mars.
Tak niður
Sí eisini