Óneyðugt at byggja nýtt tjóðleikhús

Tað er óneyðugt at byggja eitt stórt, dýrt tjóðleikhús á Skálatrøð í Havn, tí tørvurin kann nøktast á annan hátt.

Tað heldur í øllum førum kendi sjónleikarin, Bárður Persson.

Hann mælir til at hugsa øðrvísi og brúka teir pallar, sum eru komnir kring landið seinastu árini.

Neyðugt við nýggjum hølum

Barbara Hentze í Stórustovu, forkvinna í Leikarafelag Føroya, sigur í stuttari viðmerking, at tað er alneyðugt við nýggjum hølum, sum eru bygd til leiklist.

Hølisumstøðurnar á Meiarínum eru vánaligar og tað gongur út yvir trygd og trivna og avmarkar eisini, hvussu leiklistin fær ment seg. 

Viðvíkjandi tí, at nokk av hølum og ‘pallum’ eru bygdir seinastu árini, so er tað eingin loysn. Hesi høli eru ikki bygd til leiklist og tað, ið leiklistin krevur. Hartil ber ikki til hjá leiklistini at leiga hesi høli í langa tíð, tí tey eru bygd til onnur endamál.