Annar parturin má flyta seg

Samráðingarnar millum Bretland og ES um eina handilsavtalu millum partarnar eftir Brexit, eru lidnar. Tað hevur umsitingin hjá forsætisráðharranum Boris Johnson váttað.

Somikið langt er millum partarnar, at bretar siga tað verða óneyðugt at halda fram, uttan so, at ES grundleggjandi broytir støðu.

Franski Evropa ráðharrin, Clement Beaune, segði við BBC í gjár, at ES fer ikki eftir eini semju fyri einhvønn prís, men tey eru enn sinnaði at lurta eftir Bretlandi.

Vónin ikki slept enn

Michel Barnier, samráðingarleiðari hjá ES, skal til London í næstu viku. Sambært keldum er vónin um eina semju ikki slept enn, um enn hon er ósannlík.

Millum stóru ósemjurnar eru atgongdin hjá fiskiførum úr ES at fiska í bretskum sjógvi og statslig hjálp til vinnufyritøkur.

Sambært Áka Johansen, sendimanni Føroyar í London, eru samráðingarnar ikki slitnaðar, men annar parturin má flyta seg, um ein semja skal fáast í lag.