Drápsmálið í Hvannasundi er skomm fyri politiið

Ákæruvaldið ákærdi mannin fyri um náttina 20. november 2012 at hava dripið 16 ára gomlu Mariu Fuglø Christiansen við á ógreiðan hátt at hava kastað ella skumpað hana á sjógv, fyri síðani at vera farin frá henni, so at hon druknaði.

Dómsviðgerð var í málinum fyrr í vikuni, og síðan tá hava nevningarnir tikið støðu í málinum.

Niðurstøðan hjá einum einmældum nevningartingi er, at neyðugu prógvini ikki eru løgd fram, um at maðurin hevði dripið gentuna. Í dóminum verður dentur lagdur á, at einki læknaligt prógv er fyri, at nakað revsivert er farið fram, og at ivamál kundi setast við fleiri av vitnisfrágreiðingunum.

Málið er ein skemd fyri politiið í Føroyum, heldur Jógvan Páll Lassen, advokator.