FNU: Hellutangi skal takast burtur sum skjótast

- Tað, at Hellutangi liggur á Víkum, er eitt groft fingramerki á okkara náttúru, og fóðurflakin skuldi verið tikin burtur sum skjótast, heldur Jón Kragesteen, nevndarlimur í Føroya Náttúru- og Umhvørvisfelag.

Tað sigur Jón Kragesteen, nevndarlimur í Føroya Náttúru- og Umhvørvisfelag.

Tað var hin 5 apríl í ár, at Fóðurflakin, Hellutangi, sleyt seg leysan í óveðri, og settist fastur á Víkum.

Nakrar dagar seinni, hin 13. apríl, segði Atli Gregersen, stjóri í Hiddenfjord, at fyritøkan sjálv hevur ábyrgdina av at fáa fóðurflakan av Víkum aftur.

Í 2017 kærdi Føroya Náttúru- og Umhvørvisfelag umhvørvisgóðkenningina av alivirksemi á Víkum. Felagið ynskti at friða økið, men slapp ikki upp í part og varð ei heldur hoyrt í málinum.

Jón Kragesteen sigur, at Aarhus sáttmálin, sum er innførdur í flestu londum, vit sammeta okkum við, ikki er galdandi í Føroyum.

Hesin sáttmálin hevði annars givið áhugafelagsskapum, so sum Føroya Náttúru- og Umhvørvisfelagi, rætt til at verða hoyrd í slíkum málum, sum hesum á Víkum í Vágum.