Miðflokkurin er enn partur av samgonguni

Hóast Jenis av Rana, formaður í Miðflokkinum, áður hevur sagt, at Miðflokkurin ikki kann góðtaka at uppskotini um sammøður verða samtykt, so er flokkurin kortini ein partur av samgonguni enn.

At slíta samgonguna er ein týdningarmikil avgerð, og ein slík avgerð skal ikki takast í óðum verki, sigur Rani Skaalum, floksstjórnarformaður í Miðflokkinum.

Politiska støðan hevur elvt til nógvar ymiskar meiningar í baklandinum hjá Miflokkinum. Summi ynskja at fara úr samgonguni alt fyri eitt, meðan onnur fyrst vilja síggja hvussu leikur fer næstu tíðina.

Tað er ikki Miðflokkurin sum forðar fyri at samgongan kann halda fram, sigur Rani Skaalum.

Enn er ov tíðliga at siga um samgonguni er lív lagað.