Jenis av Rana: Føroyar bíða eftir Noreg

Svarið frá ES gav onga greiða niðurstøðu, um russisk fiskiskip undir Føroyum eru fevnd av revsitiltøkunum. Noreg fer væntandi í morgin at taka støðu til, um havnirnar skulu stongjast fyri russisku fiskiskipum. 

Føroyar fara at taka støðu, tá norsku mynduleikarnir hava boða frá sínari støðu.

Tað sigur Jenis av Rana, landsstýrismaður í uttanríkismálum.

16. april kom bannið í gildið, sum steðgar russiskum skipum í at koma inn í havnir í ES-londum.

Undantøk eru tó, eitt nú fyri skip, sum flyta olju og gass, matvørður og neyðsynjarvørður.

Landsstýrið fylgir ES og Noreg

Landsstýrið hevur boða frá, at Føroyar fara at fylgja revsitiltøkunum hjá ES. Ivi hevur verið um, hvørt fiskiskip eru fevnd av undantøkunum í nýggjastu revsitiltøkunum hjá ES.

Uttanríkisráðið hevur biðið ES útgreina bannið, og svarið frá ES er ikki nóg týðiligt, heldur Jenis av Rana, landsstýrismaður.

Noreg fer væntandi í morgin at taka støðu um eitt bann fyri russiskum fiskiskipum skal setast í gildið. Føroyar fer at bíða við at taka støðu, til Noreg hevur eina niðurstøðu klára.