ÍSF leggur nýggja strategi

Á aðalfundinum hjá Ítróttasambandi Føroya í gjár var ein nýggj strategi løgd fram.

Dentur verður lagdur á fýra øki: Øll skulu við, vit skulu fjálga um sjálvboðin - tað skal fyrst og fremst snúgva seg um ítróttagleði - og vit skulu styrkja úrvalsumhvørvið.

Hoyr innslag í útvarpstíðindunum.

Á aðalfundinum í gjár varð Elin Heðinsdóttir Joensen, sum hevur verið ÍSF-forseti síðani 2016, afturvald til forseta í fýra ár afturat.

Nevndarvalið annars bleiv ikki avgreitt sum ætlað, tí Schandorff Vang og Sigurd Rasmussen, sum stóðu fyri vali, ikki tóku við afturvali.

Hendan fráboðanin var tó komin so seint, at sersambondini ikki mettu seg hava stundir til at finna nýggj valevni til aðalfundin. Harumframt hevur Jon Hestoy, sum ikki stóð fyri vali hesaferð, boðað frá, at hann tekur seg úr nevndini í ótíð.

Sostatt verður neyðugt við eykaaðalfundi til at velja nýggja nevnd, men hann verður neyvan fyrr enn aftan á ólavsøku, tí á aðalfundinum í gjár var eisini samtykt, at aðalfundur, og harvið eisini eykaaðalfundu,r skal lýsast í minsta lagi tveir mánaðir frammanundan.